ബെംഗളൂരു: വീട് നിർമ്മാണത്തിനുള്ള പ്ലാനുകൾക്ക് മാസങ്ങളോളം കാത്തിരിക്കേണ്ട ദുരിതത്തിന് വിട നൽകി ഗ്രേറ്റർ ബെംഗളൂരു അതോറിറ്റി (GBA) പുതിയ ഓട്ടോമേറ്റഡ് സിസ്റ്റം അവതരിപ്പിച്ചു. ‘നമ്പികെ നക്ഷ 2.0’ എന്ന് പേരിട്ടിരിക്കുന്ന ഈ പദ്ധതിയിലൂടെ തടസ്സങ്ങളൊന്നുമില്ലാത്ത റെസിഡൻഷ്യൽ പ്ലാനുകൾക്ക് വെറും 30 മിനിറ്റിനുള്ളിൽ അനുമതി ലഭിക്കും. നിലവിൽ രണ്ട് മുതൽ മൂന്ന് മാസം വരെ സമയമെടുത്തിരുന്ന സ്ഥാനത്താണ് മിനിറ്റുകൾക്കുള്ളിൽ ഡിജിറ്റൽ സംവിധാനത്തിലൂടെ അംഗീകാരം ലഭ്യമാക്കുന്നത്. ഗ്രേറ്റർ ബെംഗളൂരു വികസന മന്ത്രി കൃഷ്ണ ബൈരെ ഗൗഡയാണ് പുതിയ പദ്ധതി ഉദ്ഘാടനം ചെയ്തത്.
ആദ്യ ഘട്ടത്തിൽ 4,000 ചതുരശ്ര അടി വരെയുള്ള (50×80 അടി) നാല് പാർപ്പിട യൂണിറ്റുകൾ ഉൾപ്പെടുന്ന പ്ലോട്ടുകൾക്കാണ് ഈ സൗകര്യം ലഭ്യമാകുക. അർഹരായ ആർക്കിടെക്റ്റുകൾ വഴി ഓൺലൈനായി അപേക്ഷ സമർപ്പിക്കാം. നഗരാസൂത്രണ നിയമങ്ങൾ പൂർണ്ണമായും പാലിക്കുന്ന പ്ലാനുകൾക്ക് ഉദ്യോഗസ്ഥരുടെ നേരിട്ടുള്ള പരിശോധനയില്ലാതെ തന്നെ സിസ്റ്റം സ്വയം അനുമതി പത്രം ഉൽപ്പാദിപ്പിക്കും. ഇതിനായി ഇ-ഖാത നമ്പർ നൽകിയാൽ മാത്രം മതിയാകും. വസ്തുവിന്റെ ഉടമസ്ഥാവകാശ വിവരങ്ങൾ സർക്കാർ ഡാറ്റാബേസിൽ നിന്ന് സിസ്റ്റം തന്നെ നേരിട്ട് ശേഖരിക്കും. അതിനാൽ രേഖകൾ പ്രത്യേകം അപ്‌ലോഡ് ചെയ്യേണ്ടതില്ല.
നിയമങ്ങൾ പാലിക്കുന്ന സാധാരണക്കാർക്ക് മുൻപിൽ സർക്കാർ ഓഫീസുകൾ കയറിയിറങ്ങേണ്ട സാഹചര്യം ഒഴിവാക്കാനാണ് സാങ്കേതികവിദ്യയുടെ സഹായത്തോടെ പദ്ധതി കൂടുതൽ ലളിതമാക്കിയതെന്ന് മന്ത്രി വ്യക്തമാക്കി. ‘വിശ്വാസം, ഒപ്പം പരിശോധന’ എന്ന നയമാണ് ഇതിനായി സ്വീകരിച്ചിരിക്കുന്നത്. ഇടനിലക്കാരുടെ ചൂഷണം തടയാനും സുതാര്യത ഉറപ്പാക്കാനും ഇതിലൂടെ സാധിക്കും. മുഖ്യമന്ത്രി ഡി.കെ. ശിവകുമാറിന്റെ നിർദ്ദേശപ്രകാരമാണ് നമ്പികെ നക്ഷയുടെ രണ്ടാം ഘട്ടം നടപ്പിലാക്കിയത്. ആദ്യഘട്ടത്തിൽ പൈലറ്റ് അടിസ്ഥാനത്തിൽ ചില നിർദ്ദിഷ്ട മേഖലകളിലാണ് ഇത് നടപ്പിലാക്കുക. പിന്നീട് കൂടുതൽ സ്ഥലങ്ങളിലേക്കും വലിയ വാണിജ്യ സമുച്ചയങ്ങൾക്കും ഇത് വ്യാപിപ്പിക്കും. എന്നാൽ പുതിയ സംവിധാനം ദുരുപയോഗം ചെയ്യുന്നവർക്കെതിരെ കടുത്ത നടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകിയിട്ടുണ്ട്.
